Den e weekend di 21-23 maart a tuma lugar e magno evento anual di BMX “Gator Nationals” na Oldsmar, Florida cu tawata un campeonato di 3 dia.

E evento organisa pa USABMX a conta cu participacion di alredor di 1100 participante den e diferente categorianan. Un total di 202 manga di careda a keda registra den e campeonato aki di cual pilotonan tawata procedente di e diferente estadonan di Merca y di alrededor di 20 otro paisnan di mundo.  

E rumanan Zaithyel y Zyqion Soekandar tambe a forma parti di un delegacion chiquito di Aruba cu a participa na e campeonato aki y a destaca cu nan prestacion conquistando varios premio cu ta varia di oro, plata y finalista di 4 y 6 puesto.

Na banda cu Zaithyel a registra pa e categoria di su edad “Expert 16” ela registra tambe pa e categoria APro cu tawata un combinacion di Junior Elite y Elite. Pa promer biaha Zaithyel ta competi cu e grandinan di BMX manera Maris Strombergs, Connor Fields, Sam Willoughby, Donny Robinson etc. Riba diavierna Zaithyel a jega te semi-final den e categoria aki y diasabra e no a clasifica. Apesar cu e no a logra jega final den e categoria aki si e la bataya ganando asina e experencia pa sigiuente caredanan den categoria Junior Elite.

Riba diavierna Zyqion a gana oro den e categoria “15-16 Open”. Den categoria “15 Expert” Zyqion a gana plata.

Riba diasabra den categoria “15-16 Open” Zyqion a finalisa na 5 lugar for di un total di 14 piloto. Den categoria “15 Expert” Zyqion a finalisa na di 6 lugar for di un grupo di 34 piloto. Den categoria “16 Expert” Zaithyel a finalisa na di 4 Lugar den un grupo di 37 piloto.

Riba diadomingo den categoria “16 Expert” Zaithyel a conquista oro den  un grupo di 37 piloto, ganando asina entre otro su rival Colombiano Juan Carlos Diaz, kende tin varios titulo mundial pero tambe e Americanonan Tucker Rice, Justin Richmond y Ryan Pettigrew kendenan tambe tin varios titulonan mundial. Den categoria “15 Expert” Zyqion a finalisa na di 4 lugar for di un grupo di 34 piloto.

Sin duda e rumannan Zaithyel y Zyqion Soekandar a hasi un tremendo papel y remarcabel tawata e promocion pa Aruba. Apesar cu nan a core bou nomber di nan team Mericano y sponsor Factory Team GHP, nan helm tawata di colornan di bandera di Aruba cu a hasi e visibel cu nan ta pilotonan Arubiano. Team GHP y XCycles ta sumamente orguyoso di nan representatenan Arubiano cu a logra e puntuacion necesario pa por a rank Factory Team GHP na di 2 lugar cu un diferencia di 1 punto entre di primer puesto den e campeonato aki.